فيد بيتك و انت قاعد فيه :)

بما ان الفتره دي كلنا مضطرين نقعد في البيت دي شويه افكار يمكن تساعد و تفتح نفسك للقعاد في البيت.

تغيير مكان الاثاث:

حط السفرة مكان الصالون و إعكس مكان السجاجيد، غير اي حاجه مكان اي حاجه المهم تعمل اي تغيير جذري يخلي شكل البيت مختلف تماما. ده هياخد منك مجهود و هيسحب كل الطاقه السلبيه اللي جواك و ممكن تخلي ولادك يساعدوا و يفرغوا طاقة الزهق اللي جواهم و بعد ما تخلصوا هتحس انك قاعد في بيت جديد و ده بيرفع من المعنويات جدا .. التغيير مطلوب، الاثاث مش لازق في الارض غير نظام بيتك كل فترة.

و انتوا بتعملوا ده اكيد هتضطر تفضي محتويات السفرة ياريت تفرزوا الحاجه من جديد و تشوفي مدى احتياجك الحقيقي للحاجه لو فيه كبايات و اطباق او اي حاجه عدى عليها سنين و مش بتُستَخدم ادوها لجمعيه خيريه في ناس تانيه هتفرح و هتستفيد بيها. نفس الكلام ينطبق على مكتبة التلفزيون مثلا إرموا كل الورق القديم و الدوشه اللي ملهاش لازمه. كنت سمعت قبل كده زمان في برنامج " أوبرا وينفري" الضيفه بتاعتها أكدت و قالت ان الحاجه اللي عدى عليها اكتر من 6 شهور و لم تُستخدم إرميها! انت كده فعليا مش عايزها ووجودها غير منطقي ولو نفذت الكلام ده في كل تفاصيل البيت هتلاقي الثُقل اللي في البيت خف شكلا و نفسياً.

الاضاءة:

الاباجورات بإضاءات مختلفه من الحاجات المهمه تكون موجوده في اي بيت، المود احيانا بيحتاج اضاءة عاليه فممكن تدعمها بالاباجورات دي و تفتحهم كلهم مع اضاءتك الاساسيه و احيانا مودك بيحتاج لاضاءة هاديه فتكتفي بإضاءة الاباجورة فقط. بلاش تعيشوا في نفس الاضاءة ده مسبب اساسي للملل من البيت. اكسسوارات البيت:

ده عامل مهم لديكور البيت و سهل تغييره جداً و من أكتر الحاجات اللي بتدي جو مختلف للمكان الخداديات و المفارش و اكياس المناديل و طبعا التابلوهات. و يفضل تشتري أكياس خداديات فقط لو انتي عندك خداديات من الاصل، كل فترة فك كيس المخده و حط جديد كنوع من التغيير هتلاقي شكل المكان اختلف تماما و طبعا تغييرهم مع المواسم سواء في الصيف او رمضان او كريسماس بيدي احساس اكتر بالاحتفال بالمناسبه و بيدي بهجه و تغيير لطيف لجو البيت.

ركن للـ ولا حاجه: هفضل اذكر الجزء ده لانه مهم قوي، كنت ذكرته في البوست السابق. لازم يكون في غرفه او ركن في البيت بيتعمل فيه اي نشاط ( شغل - رسم - لعب - عزف ) واكيد في الوضع اللي احنا فيه حاليا انت محتاج تنجز شغلك من البيت و محتاج لمكان حلو بديكور مختلف يكون شبه الاماكن اللي بتروح تشتغل او تذاكر فيها وتقعد بمزاج و تخلص اللي وراك بطاقه متجددة و ذهن صافي و هتلاقي نفسك بتنجز جداً.