!ده بيتك مش بيت الضيوف
الموضوع عن خطأ شائع أغلب البيوت المصريه بتعمله و انا اول واحدة كنت عملاها و الحمد لله ربنا تاب عليا
:)
!و هي فصل الصالون عن بقية البيت و الاولويه في المساحة للصالون
لازم يتحط في اكبر و اوسع حته، لازم عشان محدش يقول حاجة 😅
يعني مش بس خلينا استخدام الصالون من المحرمات لأ و كمان محطوط في اكبر مساحة من البيت فحرمنا نفسنا من العيشه في المساحة الكبيرة
كمان من الاسباب اللي بتخلينا نفصل الصالون عن اللي بنسميه "غرفة المعيشة" المعتقد بتاع "خلي الكركبة و البهدلة دايما في غرفة المعيشة عشان لو الضيوف جت فجأة تلاقي الشقة رايقة و الصالون نضيف و جميييييل.
جس وات ؟ محدش بيجي 😅
انا كنت عاملة كدة و السنين قعدت تجري و محدش بيجي إلا بمعاد مسبق موضوع ان حد يجي فجأة ده محصلش أبداً.
كله بيجي بمعاد مسبق ده لو جيه! "عادة كله بيخرج و بنتقابل برة عشان الزهق من البيت"
فضلنا كدة سنين عايشين واكلين شاربين في الضيق و البراح كله للصالون و للضيوف " اللي مش بتيجي".
و لما ربنا رزق بأطفال عاشوا و جريوا و لعبوا في الضيق معانا!
طب ليه كل ده ؟ هنعيش بجد في بيتنا امتى ؟ و هيفضل شبه مهجور لامتى ؟
قررت و نفذت .. طلعنا برة و التلفزيون اتحط برة و عملنا اعادة ترتيب و ديكور جديد بحلول بسيطة تتناسب مع عيشتنا و حياتنا و كان احلى قرار.
رجااااااء:
١- انت اولى ببيتك خد المساحة الاكبر و عيش مرتاح ده بيتك مش بيت الضيوف!
لو لازم يكون في صالون و اوضة معيشة اعكس، حط الصالون في اوضة و سميها زي ما كانوا بيقولوا زمان "اوضة الضيوف".
٢- لو انت هتتجوز جديد متجبش طقمين للجلوس وفر فلوسك هات طقم واحد مش عيب ان انت و الضيف تستخدموا حاجتك 😃
و بلاش الهاجس بتاع "الحاجة هتتبهدل" ما تتبهدل و ننضف .. ما تتبهدل و نبقى نجيب غيرها بلاش كلمة عفش العمررررر 😂 كله بيزهق و بيحب التغيير فمتجبش حاجة مكلفه قوي من البداية.
